بالألوان الطبيعية

انا اتفرجت علي الفيلم و الحقيقة اني قبل لما ادخل السينما .. كنت متخيلة حاجة معينة .. و يمكن لاسباب اغلبها شخصية ، كنت ناوية اكتب رأيي في الفيلم و فكرته. مفيش شك ان الفيلم حلو و جديد، ميخنقش.. تحب تتفرج عليه و تحس انك ممكن تدخله تاني لانه فيلم ظريف .. أبطاله دمهم خفيف .. ايقاعه حلو جدا و مش ممل .. الموسيقي تجنن.. والاهم انها فكرة فعلا عظيمة !! فكرة مكنتش متخيلة ان حد من أهل الفن واعي لها كدة ...و كنت مهتمة جدا اني اشوف المخرج هيعرضها ازاي و ايه روئيته ليها ... و قلت اني هشوف حاجة مختلفة و تحمست و تفاءلت جداً، و فعلا شفت حالة مختلفة .. في جرأة في الفكرة بغض النظر عن طريقة العرض ... في تمثيل... مش رائع... لكن مش سئ نظرا لان كلهم وجوه جديدة نسبيا .ً... خرجت من الفيلم .. نوعاً ما مبسوطة .. ضحكت في مشاهد .. و بكيت في مشاهد، فيلم ناجح ظاهريا... بس لما شفته بعمق.. اكتشفت حاجات تانية
بعدما الفيلم خلص ...و خرجت من الحالة بتاعتة و بدأت أفكر... اكتشفت ان ممكن جدا قناعات القائمين على الفيلم .. تبقي مختلفة تماما مع اللي بيتقدم و يتعرض !!! و دة بالنسبة لي مفهوم و مقبول .. زي اللي بيحكي قصة حرامي .. مش لازم يكون شايف ان السرقة صح.. لكن مينفعش يكون مثلا سارق فكرة الفيلم و يقدملي فيلم عن حقوق الملكية الفكرية!! و دة اللي المخرج عمله في الفيلم ده ..و بالنسبة لي كان شئ غريب .. كان مثال للبني ادم اللي بيتدعي الفضيلة .. بس هو أبعد ما يكون عنها .. او حتى العكس ... انسان فاضل جداّ .. و بيصور موبيقات الحياه... مفهمتوش.

وبما اني بشوف ان شخصية المخرج جزء لا يتجزأ من اللي بيقدمه .. و ان اعماله هي رسالته ... فانا رأيي ان الفيلم ده و مخرجه خسروا كثير جداّ .. و فشل انه يوصلي رسالته... لان ببساطة .. طريقة عرضه للفيلم تتنافي تماما مع الرسالة اللي كان بيقدمها... و اعتقد انهم كانوا لازم يكملوا بعض خاصة في فيلم زي ده ... حتى لا يفقد مصداقيته.. و يخسر اتباع رسالته... و انا خرجت كسبانة فيلم ... متعني بشكل ما ..لكن خسرانة مخرج ..و مؤلف ...و ممثلين

... و بعد تفكير.. لقيت ان كل ارائي حول الفيلم .... تتلخص في كلمة واحدة ...وهي ليه ؟؟؟

مبدأيا ... ليه ده يكون الترايلر بتاع الفيلم.. و ليه يوصل الصورة دي للناس عنه .. في حين ان الفيلم فيه معاني اكبر و أهم بكتير من المشاهد الي جت في الترايلر. ليه مطلعين كلية كاملة مافيهاش بني ادم واحد سوي.. شكلا أو موضوعا. ليه مطلعين رجل الدين كالعادة اهبل - بغض النظر عن مدى صحة كلامه او اختلافي او اتفاقي معاه- الاكيد ان في رجال دين اقل و اكثر تشددا .. ممكن يطلعوا يقولوا نفس الكلام بس بوقار عما ظهر في الفيلم. ليه مخرج عاوز ينتقد فكرة تحريم الفن و بيحاول يوصلي رسالة - عن طريق الفن- ان الفن رسالة، يقوم يطلع لي 3 مشاهد في الفيلم بــ3 بوسات اوسخ من بعض - منغير اعتذار عن اللفظ لأن هو ده الوصف الصح- ناهيك عن الكلوزات المعمولة على جسم البنات في اكثر من مشهد من غير أي هدف فني الحقيقة و عايزني في الاخر اقول ان ده مش حرام.. ده فن !! ليه لما البطل بيحاول يبرر لنفسه اعماله .. يقول " ما هو هنيدي بيمثل و بينجح و أفلامة مافيهاش ولا بوسة" ... هل الحرام في الافلام بقي بس البوسة؟ و لا هنيدي مش شايف باقي الناس اللي معاه في الفيلم بتعمل ايه... و لا هي الناس بتقول ان الفنان بشخصة هيدخل جهنم؟ ليه مطلعلي ان الشخصية الوحيدة اللي حاولت تخرج بره العالم ده و تتجنبه .. قررت تتنقب و تقعد في البيت و تربي العيال !!! كأن مفيش حل تاني..و كأن احنا دين لا يدعو للوسطية.

من الحاجات اللي معجبتنيش في الفيلم ... التحولات السريعة في الأشخاص و الغير مببرة ... من غير اي موقف يدعو للتحول ... مثلا البطل اللي طالع طول الفيلم جواه نسبة من الايمان او الخوف من ربنا لدرجة انه بيفكر يغير مستقبله عشان خايف من ربنا ... فجأة ، حب معيدة منحرفة - دون مقدمات، انا مش معترضه انه يحبها .. لكن محتاجة اعرف ايه هي نقطة التحول في شخصيته، خاصة انه طول الفيلم لم يضعف او يستسلم للوضع ، كان دايما بيحاول يفهم، حتى في علاقتة مع البطلة ، فكانت في اطار ضعف شباب او احتياج للحب او للعلاقة الجنسية، ملهاش علاقة بفكرة الفيلم او مدى حرمانية الفن

الحاجة الثانية هو موقف البنت الي نصفها اجنبي من صاحبها .. لما فجأة و بدون سابق انذار هاجمت الولد بشدة انه بيعمل كل حاجة من غير احساس و كل حاجة بيعملها صنعة ، في حين ان هي اللي قررت من الاول ان علاقتهم تكون من غير مشاعر ، ايه اللي غيرها فجأة و خلاها تقول الكلام ده .. حتى قبل ما تقول انها حامل !! ، و ان كان رفضه لحملها مبرر جداً نتيجة الاطار اللي هي حطت فيه العلاقة ، و نتيجة عدم احتياجها لمساعدته في تربية الطفل او الاعتراف به بحكم انها اجنبيية

 لو انا مخرج الفيلم ... هاعمل الأتي .. و أتوقع ان فيلمي يكون انجح .. اذكي ..و انضف من كده

 1- هشيل الـ3 بوسات ... و هبدلهم بكلوز علي شعرهم او على اديهم و هي في ايد بعض.. او حتى بصوت اعاصير و زعابيب زي الافلام القديمة.. و الرسالة وصلت. 2- هجيب الناس كلها بتتكلم على الدكتورة المنحرفه اللي في الجامعة و بيحكوا مواقفهم معاها .. و كفاية اوي الماكياج و شعرها و طريقة كلامها اللي ممكن يوحولي هي عاوزة تعمل ايه... و هشيل المشهد اللي هو مقرب فيه من فاتحة التوب !! و الرسالة وصلت. 3- هشيل المشهد اللي البطل نايم فيه علي بطن حبيبته ..أو حتى هغير الزاوية اللي اتصور منها .. و اللي شاف الفيلم هيفهم ليه... و مفيش اي رسالة من وراء المشهد ده الحقيقة .. كان ممكن البطلة تفوق و تعيط و تندم و هي لابسة هدومها. 4- هطلّع في الفيلم شخصية سوية ... مش اكتر حد صح .. لكن سوي .. حد هيكمل في المجال ده ..و يعيش نضيف .. منغير ما يتلكك و يستسلم.. حد هيرفض انه يقدم السكيتش المطلوب للجسد العاري .. و يضحي بأعمال السنة .. و يتأكد ان ربنا هيكرمه بشكل ما .. حد هيفضل فنان .. بس نضيف. 

خلاصة الكلام ... عبيط اللي يقول ان الفن حرام ... و عبيط برضة اللي يحصر الفن في بوسة او مشهد او تمثال عاري و يحرمه ... بس منتهي الغلط اننا نقول ان الحاجات دي مش حرام و نبررها لنفسنا عشان دي جزء من الكل وعشان دي رسالة !!. الدنيا ماليانة غلطات ... و حقيقي ان كل المجالات فيها الصح و الغلط .. و فيها الحرام و الحلال اللي مفيش عليه خلاف .. و هي في الاخر اختيارات ... و كل حد بيتحمل نتيجة اختياره ...منغير فلسفة و مبررات.. و بيبقي قد الذنوب و يعرف ان مفيش تفاوض و لا ومناقشة في الحرام و الحلال بتاع ربنا ..الحلال بيّن و الحرام بيّن... في اي مجال و في أي وسط... و ربنا في الاخر هو اللي
هيقيس الغلطات دي .. من وسط غلطات تانية كتير بنعملها
و بكل صدق .. انا بأشفق علي كل فنان .. و كل صاحب موهبة ...باشفق عليهم من الصراع و من الابتلاء و الاختبار اللي ربنا بيحطهم فيه.. حياه مش سهلة .. و ربنا يقويهم عليها...بس نصيحتي لهم .. انكم لو اتنازلتوا عن بعض الأشياء في الفن و بعض الطرق اللي بتوصّل - بقول بعض مش كل- ... ساعتها تبقوا عملتوا الموازنة الصح ، من ناحية ارضيتوا ربنا، و من ناحية ثانية ارضيتوا انفسكم و فنكم اللي ربنا وهبهولكم.. واللي مش مطلوب منكم تتنازلوا عنه.


 No Offense.... انا اسفة