كل ما آكُل شوكولاتة ... يجيلي حساسية... آكُل مانجا... يجيلي حساسية ...آكُل فراولة... يجيلي حساسية و الحساسية اللي بتجيلي
بتتعالج بحقنة، الحقنة دي فيها نسبة مخدر .. و بما اني مش خبرة في الحاجات دي فالحقنة بتعملي أحلى دماغ
...المهم
بتتعالج بحقنة، الحقنة دي فيها نسبة مخدر .. و بما اني مش خبرة في الحاجات دي فالحقنة بتعملي أحلى دماغ
...المهم
الحل اية ؟؟؟ مفيش شكولاتة .. لفترة من الزمن ... لحد ما يشوفوا حل للي بيحصللي ده
أعدت أفكر انا قد ايه متأثرة اني مش عارفة آكُل الحاجات اللي بحبها ، و قد ايه الموضوع ده مأثر على نفسيتي و مضايقني جداً، مع ان معظم الحاجات اللي اتمنعت منها دي رفاهيات .. مش مجوعنّي يعني.. و في نفس الوقت كلها شهر و لا اتنين و أرجع أكلهم تاني ... بس فكرة الحرمان من الشئ اللي بحبه ذات نفسه مهما كان صغير .. بتضايقني
وصل بيا التفكير لمرحلة أعلى شوية .... انا زعلانة عشان حتة شوكولاتة ... يا عيني على جدتي الله يرحمها اللي كانت ممنوعة من الملح .... كان الأكل وحش أوي وملهوش طعم .. لا.. حتى جدتي ربنا كان رحيم بيها .. ده يا عيني على فلان اللي ممنوع من اللحمة .. و لا فلانة اللي سنانها بايظة و مش عارفة تأكل اصلاً ... و يا عيني على اللي معهوش ثمن الحاجة اللي هو عاوزها أو نفسه فيها او حتي محتاجها ... و يا عيني على اللي كان عنده أي حاجة عزيزة عليه و راحت
مش بحاول هنا أتكلم عن العدل و المساواه و التكافل الاجتماعي و مساعدة الغلبان ... لأن الموضوع أكبر من كده ... ياما مرتاحين و أغنياء و محرومين من أشياء موجودة عند الفقير و ميقدرش يستغني عنها ...و العكس صحيح... سواء كانت أشياء مادية أو معنوية من صحة او ذرية صالحة أواهل أو صحاب أو بيت صغير أو شغل كويس أو عائلة مُشَرفة أو احساس بالأمان أو راحة البال أو ستر أو وش مريح أو محبة ناس ... حاجات عمر الواحد ما بيفكر فيها ... أو يتخيل انها ممكن تروح منه فبالتالي يحاول يحافظ عليها لو حتى بالدعاء و شكر ربنا
و فجأة قررت أركز في النعم اللي ربنا مديهالي .. و الحاجات اللي اخدها مني .. او حتى عمره ما اداهالي و تخيلت انها ناقصاني.. مهما كانت... لقيت اني خايفة على حاجات كتير عندي ... و بادعي من ربنا يديم عليا نعمه و يحفظها من الزوال .. و بقيت لما بطلب حاجة زيادة منه .. بطلبها على استحياء .. طمعا مني في كرمه ... مش احساس بالنقص عندي... الحمد لله
8 comments:
منة بجد انتي اتكلمتي في حاجة مهمة قوي
هي فكرة إحساسك بالحرمان من شئ وكمان الأصعب إن الحرمان ده يكون غير مبرر أو على الأقل انتي مش شايفة إن تبريره مقنع
شعور متعب جدا وبيفقدك مع الوقت إحساسك باللي معاكي واللي انتي نفسك فيه
متشكرييييين :))
ايه الجمال والعقل ده
بجد بسيطة جدا بس عميقة اوي
;))))
وساعات يحصلي نفس الموقف
بس في التخن والخسسان
بجد واد ايه ساعات استهبلني واعد احمد ربنا
انه بجد الحمد لله
ميمنعش انه احاول اتحسن وادعي بالزيادة من اي حاجة عندي او معنديش
بس زي ماقلني
طمعا مني في كرمه ... مش احساس بالنقص عندي
وفعلا الحمد لله
الحرمان فعلا شئ صعب جدا والسخط عليه مؤمن يؤدى بالإنسان بحالة من التمرد ممكن توصل على اللى خلقه، فعشان كدة فعلا مهما حسينا إن احنا اتحرمنا من حاجة لازم نفكر إن فيه نعم تانية مازالت فى إيدينا لازم نحمد ربنا عليها، خاصة لو اتحرمنا من أشياء ثانوية مش محرومين من نعمة البصر أو الكلام أو الحياة الآمنة
رنا: نتعلم من ده ايه؟ نقول الحمد لله .. و اللي يشوف بلاوي الناس ... تهون عليه بلوته... عفواً :)
مريم: مبسوطة انها عجبتك .. بس بلاش في التخن دي :)
فضالي: فكرة السخط على الحرمان من الشئ فعلاً ممكن تكون مؤذية لاقصي درجة .. و تؤدي الى حرمان أكبر ... و لإن شكرتم لأزيدنكم
عارف يا منة أنا بقيت على قد ما أقدر أحاول أتبسط بكل حاجة و أرضي بالمقسوملي..
و أحاول أبقي "ممتنة" مش بس بحمد ربنا على الحاجات و الناس اللي معايا..لأني عارفة أن كل حاجة في الاخر ليهااخر..
حاسة أن محور الموضوع الرضا...لو أتعلمناه مفيش أى حاجة بعد كده ممكن تحسسنا بالحرمان...
(أنا سامعاكي في اللي بقراه) ;)
اوك
صباح الخير اولاً :)
طبعا ده كلام مهم جداً، بس المشكلة ان الدنيا زحمة جداً، والناس مفيش حد فيهم بيحاول يفهم او يدرك ان لو فيه حد معاه حاجه.. فهي من تعبه ومن اجتهاده وحاول فيها كتير جدا لحد ما وصلها، ولو فيه حاجة مش مع حد، ده مش معناه انه ماجتهدش او انه ميستحقش ده او انه ملعون وان ربنا غضبان عليه، سواء كده او كده كله نصيب واجتهاد وطرق وسبل احنا ماشيين فيها
كنت لسه باتكلم مع والدي ان كل حاجة خير لينا، بس احنا مش مدركين ان فيه خطوات، فيه خطوات عشان الواحد يوصل لحاجة كبيرة، حلوة، مهمة، ناجحة، طعمها حلو او مر، فيه خطوات كل واحدة بتوصل للتانية بس احنا ما بنصبرش
يعني انا مش هاصحي الصبح الاقي نفسي عندي فيلا علي الجبل في لوكسمبورج او اكون تالت اكبر مورد للسمك والجمبري في ليبيا أو حتي اكون صاحب اسطول بواخر من اللي بتغرق الناس وهي رايحة تحج ولا تعمل عمرة
فيه خطوات كل واحد بيمشيها
عشان يشوف مصيره و ياخد رزقه بإيده مش بإيد غيره
سئل الحسن البصري عن سر زهده في الدنيا فقال اربعة اشياء: علمت ان رزقي لا يأخذه غيري فاطمأن قلبي، وعلمت ان عملي لا يقوم به غيري فانشغلت به وحدي، وعلمت ان الله مطلع علي فاستحييت ان يراني عاصياً، وعلمت ان الموت ينتظرني فأعددت الزاد للقاء ربي
والي اللقاء في حلقة قادمة ااااااان شاء الله
تارارا رااااااا
تاراراررااااااا
راراراراراراراااا
صباح الفل :)
عز ... مش هعلق على موضوع خسارة الماتس دة .. الرد في الملعب و عندك عالبلوج :)
ابو علي ... دعوة جميلة اوي .. ربنا يخليك ... بس انت حرمنا منك و تقلان عليا اهو :(
اظهر بقي.. منوون تناديييييييييي
de 2a7la 7aga 2aret-ha men fatra msh 2olayela ya Manoon :)
el fekra gameeeeeeeeelaaaaaa, rabena maye7remek men 7aga ya habebty w yen3em 3aleeky b kol 7aga btotlobeeha 3la este7ya2 wnty 3ndek yakeen bellah :)
howa el wa7ed bs sa3at byensa nafso w yetma3, msh 2allek el bany2adem tamma3 b tabe3to, 7a2eeeeee2aaaa, law kol wa7ed fakkar felly 3ndo hayefra7 awy walahy, elhmdo lellah..
الحمد لله الذي عفانا مما ابتلى به غيرنا
الحمد لله الذي رزقنا كل هذا من غير حول منا ولا قوة
اللهم لك الحمد و لك الشكر و لك الثناء الجميل
Nesma
Post a Comment